«ՀԱՅ» ասոցիացիան հիմնադրվել է Տիգրան Հակոբյան Հովհաննիսյանի կողմից՝ Իսպանիայի Վալենսիա քաղաքում: Շարժառիթը եղել է նրա ընկերոջ հետ կապված մի պատմություն, ով ավտովթարի պատճառով զրկվել էր երեխա ունենալու հնարավորությունից: Հայաստանում ապրող իր մանկության ընկերոջն օգնելու համար Տիգրան Հակոբյանի նախաձեռնությամբ իր ընկերների շրջապատում գումար է հավաքվում և ուղարկվում նրան՝ արտամարմնային բեղմնավորման միջոցով երեխա ունենալու համար: Ցավոք, բժիշկները փաստում են, որ այս դեպքում միջմատությունն անհնար է իրականացնել և արդյունքի հասնել: Հավաքված գումարն ընկերներից ոչ ոք, իհարկե, չի ցանկանում ետ վերցնել: Փոխարենը այդ նպատակով հովանավորում են կարիքավոր մեկ այլ զույգի: Արդյունքը՝ ծնվում է եռյակ՝ երկու աղջիկ, մեկ տղա: Ընկերների ոգևորությունն անսահման էր, և շարունակում են Իսպանիայում, ինչպես նաև այլ երկրներում ապրող մյուս ընկերներից գումար հավաքել ու հովանավորել Հայաստանում ապրող ևս երկու ընտանեկան զույգի: Երկուսի մոտ էլ չի ստացվում: Սակայն ոչ Տիգրանը, ոչ ընկերները չեն հուսահատվում և հովանավորում են ևս երկու զույգի: Նրանցից մեկի դեպքում գրանցվում է հղիություն: Արդյունքում ստեղծվում է «ՀԱՅ» ասոցիացիան՝ «Հայ մանուկ» ծրագրով։ Ասոցիացիան սկսում է ընդլայնել իր գործունեությունը՝ Վալենսիայից տարածվելով Հայաստան: Հայաստանում ստեղծվում է գրասենյակ, որի ղեկավարն է դառնում Լիլիթ Ադիբեկյանը: Վերջինիս անշահախնդիր նվիրվածությամբ՝ Ասոցիացիայի հայաստանյան գրասենյակը սկսում է լայն գործունեություն ծավալել: 

Որոշ ժամանակ անց Տիգրան Հակոբյանը պատահաբար մի սեղանի շուրջ ծանոթանում է Լոս Անջելեսում ապրող Արթուր Գալստյանի և նրա ռուսաստանաբնակ ընկերոջ՝ Արթուր Ջիլավյանի հետ, պատմում նրանց «ՀԱՅ» ասոցիացիայի գործունեության մասին: Ոգևորվելով ծրագրից ու դրա նպատակից՝ նրանք հանձն են առնում մեկական ընտանիքի հովանավորություն: Իսկ Արթուր Գալստյանի հետ համատեղ որոշվում է բացել «ՀԱՅ» ասոցիացիայի մասնաճյուղը ԱՄՆ-ում: Մասնաճյուղը ստեղծվում է և կոչվում «Հայ Նորթ Ամերիկա»: Սկսվում է ասոցիացիայի աշխատանքը նաև ԱՄՆ-ում՝ Արթուր Գալստյանի ղեկավարությամբ: Բացի ամերիկյան մասնաճյուղի աշխատանքը համակարգելուց Արթուր Գալստյանն այս ընթացքում անձամբ հովանավորել է շուրջ երկու տասնյակ հայ ընտանիքների:  

Այն բանից հետո, երբ արդեն ծնվել էին մի քանի տասնյակ երեխաներ, «ՀԱՅ» ասոցիացիային է միանում նրա գլխավոր հովանավոր, ամերիկահայ բժիշկ Գևորգ Սեդրակյանը, ինչի շնորհիվ ասոցիացիայի գործունեությունը՝ իր «Հայ մանուկ» ծրագրով, սկսում է մեծ թափ հավաքել:  

Այս ամբողջ ընթացքում ասոցիացիան նախաձեռնել և իրագործել է նաև այլ բնույթի բարեգործական ծրագրեր, մասնավորապես «Քովիդ-19» համաճարակի ժամանակ, 44-օրյա պատերազմի ընթացքում, ծրագիր՝ կապված զինվորների ընտանիքներին հետ, և այլն: Այժմ էլ մշակվում են նոր ծրագրեր, սակայն «ՀԱՅ» ասոցիացիայի առաքելությունը «Հայ Մանուկ» ծրագիրն է: